ගෝඨාභය අගමැති කිරීමට මෛත්‍රීගේ සැලසුමක්?


හිටපු ආරක්ෂක ලේකම් ගෝඨාභය රාජපක්ෂ මහතා අගමැති පදවියට පත්කොට, මීළඟ ජනාධිපතිවරණයටත් තරග කිරීම ජනාධිපති මෛත්‍රීපාල සිරිසේන මහතාගේ උත්සාහය බව ජනතා විමුක්ති පෙරමුණ පවසයි.

අගමැති රනිල් වික්‍රමසිංහ මහතා පදවියෙන් ඉවත් කිරීමට ජනාධිපතිවරයාට අවශ්‍යව තිබෙන්නේ ඒ සඳහා බව ද ජනතා විමුක්ති පෙරමුණේ ජාතික සංවිධායක බිමල් රත්නායක මන්ත්‍රීවරයා 'බීබීසී සිංහල සේවය'ට පැවසීය.

රටේ වත්මන් දේශපාලන වාතාවරණය පිළිබඳව ෆේස්බුක් ඔස්සේ බීබීසී සිංහල සේවය සමග සජීව සාකච්ඡාවකට එක්වෙමින් ඒ බව කියා සිටි බිමල් රත්නායක මන්ත්‍රීවරයා පවසන්නේ ජනාධිපතිවරයාගේ "අභ්‍යන්තර දේශපාලන අවශ්‍යතාව" කවරක් දැයි පසුගිය පළාත් පාලන මැතිවරණය සමයේ ඔහු හැසිරුණු අන්දමින් පැහැදිලිව දක්නට ලැබුණු බවය.

බිමල් රත්නායක මන්ත්‍රීවරයා සමග සාකච්ඡාව නරඹන්න.



"එතුමා ජනාධිපති ධුරය අහෝසි කරන්නේ නෑ. ඒක පැහැදිලියි. ඒ නිසා නැවත ජනාධිපතිවරණයකදී ඔහුට මහින්ද රාජපක්ෂ මහතා ළඟ තියෙන ඡන්ද ටික අවශ්‍යයි. ඒ නිසා ඔහුට ඕනකම තිබුණා මහින්ද රාජපක්ෂ හැර රාජපක්ෂ පවුලේ වෙනත් පුද්ගලයෙක් සිටිනවා නම් ඔහුගේ සහයෝගයත් තමන්ට ලබාගන්න."

එබැවින් ගෝඨාභය රාජපක්ෂ ද "හවුල් කරගෙන" ජනපතිවරණයට ඉදිරිපත්වීම ජනපති සිරිසේන මහතාගේ සැලසුම වී තිබූ බව ඔහුගේ විග්‍රහය වී තිබේ.

"ජනාධිපතිතුමාට ඕනකම තිබුණා මහින්ද රාජපක්ෂ හැර රාජපක්ෂ පවුලේ වෙනත් පුද්ගලයෙක් සිටිනවා නම් ඔහුගේ සහයෝගයත් තමන්ට ලබාගන්න"

කෙසේ වුවත් පළාත් පාලන මැතිවරණයෙන් අනතුරුව එක්සත් ජනපදයේ සිට යළි සිය රට බලා පැමිණි අවස්ථාවේ ශ්‍රී ලංකා නිදහස් පක්ෂයෙන් අගමැති ධුරය භාරගන්නා ලෙස ආරාධනාවක් කළහොත් එය පිළිගන්නේ දැයි මාධ්‍යවේදීන් විමසූ විට හිටපු ආරක්ෂක ලේකම්වරයා කියා සිටියේ, "බැහැනේ මම ඇමරිකානු පුරවැසියෙක් ඉතින් මට අගමැතිකම් භාරගන්න බැහැ," යනුවෙනි.

තමන් තවමත් ඇමෙරිකානු පුරවැසියෙකු වන බැවින් දේශපාලනයට පිවිසීමේ සැලසුමක් "තවම නැහැ," බවත් ගෝඨාභය රාජපක්ෂ මහතා එහිදී සඳහන් කළේය.

'කොමඩියක්' පමණක් නොව 'ට්‍රැජඩියක්:

බීබීසී සිංහල සේවය සමග ෆේස්බුක් සංවාදයේදී පසුගිය ඉරිදා සිදු කළ කැබිනට් සංශෝධනය පිළිබඳව අදහස් දක්වමින් බිමල් රත්නායක මන්ත්‍රීවරයා කියා සිටියේ, ගතව ගිය වසර තුනක කාලය තුළ වත්මන් ආණ්ඩුවේ සමස්ත ක්‍රියාදාමය 'කොමඩියක්' පමණක් නොව 'ට්‍රැජඩියක්' (ඛේදවාචකයක්) ද බවය.

විශේෂයෙන්ම සාගල රත්නායක අමාත්‍යවරයා යටතේ තිබූ නීතිය හා සාමය අමාත්‍යාංශය තාවකාලිකව අගමැතිවරයා යටතට පත්කිරීම මගින් කිසිදු වෙනසක් සිදු නොවන බව ජනතා විමුක්ති පෙරමුණේ ස්ථාවරය වී තිබේ.

අගමැති, ජනති දෙදෙනාම රාජපක්ෂ පවුල ආරක්ෂා කරනවා

"නමුත් විශේෂයෙන්ම ජනවරමට අදාළව දූෂිතයන්ට එරෙහිව නඩු කටයුතු කරන්න බැරි වුනේ, මම හිතන්නේ නැහැ ඒක සාගල රත්නායක මහතාට අදාළ කරුණක් කියල," බිමල් රත්නායක මන්ත්‍රීවරයා පැවසීය.

"මොකද ශ්‍රී ලංකා නිදහස් පක්ෂය බෙදා වෙන් කර තබා ගැනීමේ අවශ්‍යතාවයට විශේෂයෙන්ම අග්‍රාමාත්‍යවරයා රාජපක්ෂ පවුලට අදාළ නඩු කටයුතු සීමා කළා, ඒවා හරියාකාරව ක්‍රියාත්මක වෙන්න දුන්නේ නැහැ කියන එක පැහැදිලි කාරණයක්."

ශ්‍රී ලංකාවේ අධිකරණයේ 'දෙබිඩි ප්‍රතිපත්තියක්' පිළිබඳව මානව හිමිකම් සම්බන්ධ එක්සත් ජාතීන්ගේ මහ කොමසාරිස්වරයා පවා මෑතදී සඳහන් කර තිබුණු බවත් සිහිපත් කළ ඔහු පවසන්නේ අගමැතිවරයා පමණක් නොව ජනාධිපතිවරයා ද සිය අනාගත සැලසුම් වෙනුවෙන් රාජපක්ෂ පවුලේ "තෝරාගත් සාමාජිකයන්" ආරක්ෂා කරන බවය.

කෙසේ වුවත් 2015 ජනපතිවරණයෙන් පසුව රාජපක්ෂ පාලනය දැඩි විවේචනයට ලක් කළ මෛත්‍රීපාල සිරිසේන ජනාධිපතිවරයා, 2015 මාර්තු මාසයේ බීබීසී සිංහල සේවය සමග විශේෂ සාකච්ඡාවකට එක්වෙමින් කියා සිටියේ, ජනපතිවරණය දින ජීවිත ආරක්ෂාව පිණිස තමන් මිතුරෙකුගේ නිවසේ රාත්‍රිය ගත කළ බවය.

ජනපතිවරණයෙන් පරාජය වූයේ නම් සිය "මුලු පවුලම විනාශ කිරීමේ සැලසුමක්" තිබුණු බව ද ජනාධිපති මෛත්‍රීපාල සිරිසේන මහතා ඒ අවස්ථාවේ බීබීසී යට පැවසීය.

No comments:

Info Sri Lanka TV

Powered by Blogger.