රනිල් අනතුරේ : විශ්වාසභංගයට රහස් ඡන්දයක්.


රනිල් වික්‍රමසිංහ මහතා පක්ෂ නායකත්වයෙන් ඉවත්විය යුතු බවට ඔහු නායකත්වය දෙන එක්සත් ජාතික පක්ෂයෙන් එල්ල වන බලපෑමත්, ඔහුට එරෙහිව ඒකාබද්ධ විපක්ෂයෙන් ඉදිරිපත් කරන විශ්වාසභංග යෝජනාවත් ඔහු දරන අගමැති ධුරය යටතේ තවදුරටත් ආණ්ඩුවේ තනතුරු දැරිය නොහැකි බවට හා විපක්ෂයේ අසුන් ගන්නා බවට ශ්‍රී ලනිප මැති ඇමැතිවරුන් කරන බලපෑමත් හමුවේ අග්‍රාමාත්‍ය රනිල් වික්‍රමසිංහ මහතා මරණ තුනක් ඇති මිනිසෙක් පැණි කෑ ආකාරයේ දේශපාලන උවදුරකට මුහුණ පා සිටී.

එක්සත් ජාතික පක්ෂයේ නායකත්වය සම්බන්ධයෙන් ඉකුත් මාස කිහිපය තුළ පැවැති අර්බුදකාරී තත්ත්වය උග්‍ර අතට හැරී පක්ෂය දෙකඩවී අගමැති රනිල් වික්‍රමසිංහ පක්ෂ නායකත්වයෙන් පමණක් නොව අගමැති තනතුරෙන්ද ඉවත් කෙරෙන තත්ත්වයක් දැන් නිර්මාණය වෙමින් පවතී.

මේ මස අවසන් වීමට පෙර පක්ෂයේ නායකත්වයෙන් ඉවත්වී පක්ෂය ප්‍රතිසංවිධානය කිරීමට අවස්ථාවක් රනිල් වික්‍රමසිංහ මහතා විසින් ලබා නොදුණහොත් දැනට ඒකරාශී වී සිටින එජාප පසුපෙළ මන්ත්‍රිවරු 28 දෙනකු විසින් අස්සන් කර වික්‍රසිංහ මහතා අගමැති තනතුරෙන් ඉවත් කිරීම සඳහා විශ්වාසභංග යෝජනාවක් ඉදිරිපත් කිරීමට තීරණය කර ඇත. මේ කණ්ඩායම ඇමැති, නියෝජ්‍ය ඇමැතිවරුද වෙති.

ඒකාබද්ධ විපක්ෂය පසුගිය සිකුරාදා අගමැතිට විරුද්ධව විශ්වාසභංග යෝජනාවට අස්සන් ලබාගත් අතර ශ්‍රී ලංකා නිදහස් පක්ෂයේ මන්ත්‍රිවරුන් පිරිසක්ද එයට අස්සන් තබා ඇත.

රනිල් වික්‍රමසිංහ මහතා අගමැති ධුරයේ සිටිනතාක් කුමන බලපෑම් එල්ල වුවද පක්ෂයේ නායකත්වයෙන් ඉවත් නොවන බව සඳහන් කරන එජාපයේ එම මන්ත්‍රි කණ්ඩායම වික්‍රමසිංහ මහතාට තවදුරටත් අගමැති ධුරයේ කටයුතු කිරීමට අවස්ථාව සලසමින් පක්ෂ නායකත්වයෙන් ඉවත්වී පක්ෂය ප්‍රතිසංවිධානය කිරීමට අවස්ථාව සලසන ලෙස ඉල්ලීම් කළ අවස්ථාවේ ඒ අනුව පක්ෂයේ නායකත්වයෙන් ඉවත් වන බවට කැමැත්ත පළ කළත් ඉවත් වන දිනය මෙතෙක් ප්‍රකාශයට පත් නොකිරීම නිසා තවදුරටත් බලා සිටීම මිරිඟුවක් පිටුපස යෑමක් බව එම මන්ත්‍රි කණ්ඩායමේ අදහස වී ඇතැයි එම කණ්ඩායමේ ජේ‍යෂ්ඨ මන්ත්‍රිවරයෙක් පැවැසීය.

තම පක්ෂයේ නායකයා ලෙසත් අගමැති තනතුර දැරූ අවස්ථාවලදීත් ප්‍රශ්නයක් ඇතිවූ හැම අවස්ථාවකදීම ඉන් බැහැරවීම සඳහා කමිටු පත්කර වාර්තා ලබාගෙන ඒවා හමස් පෙට්ටියට දැමීම සුපුරුදු ක්‍රියාවක් බැවින් පක්ෂ නායකත්වයෙන් ඉවත්වී පක්ෂය පූර්ණ ප්‍රතිසංවිධානයකට ලක් කිරීමට අවස්ථාව ලබා දෙන ලෙස කළ ඉල්ලීම සම්බන්ධයෙන්ද ඔහු සුපුරුදු ක්‍රියා පිළිවෙත අනුගමනය කරමින් සිටින බවද එම මන්ත්‍රිවරයා අවධාරණය කළේය.

තම කණ්ඩායම ගෙන ඇති තීරණය ඉදිරි දිනකදී අගැමැතිවරයා හමුවී දැනුම් දෙන බවද ඔහු පැවැසීය.

මේ අතර රනිල් වික්‍රමසිංහ මහතා අගමැති ධුරය දරන ආණ්ඩුවක තවදුරටත් මැති ඇමැතිකම් දරන්නට සූදානම් නැතැයි පවසන ශ්‍රී ලංකා නිදහස් පක්ෂයේ මැති ඇමැතිවරුන්ගේ බහුතරය, ශ්‍රී ලනිප ඇමැතිවරුන්ගේ කැබිනට් සංශෝධනය කිරීමට පෙර අගමැති ධුරයේ වෙනසක් ඇති කළ යුතු බවට එම කණ්ඩායම ජනාධිපතිවරයාට හෙට (සඳුදා) ලිපියක් භාරදීමට නියමිතය.

රහස් ඡන්දයක්

මෙම විශ්වාසභංග යෝජනාව සඳහා රහස් ඡන්දයක් ගැනීම සඳහා ඒකාබද්ධ විපක්ෂයේ අවධානය යොමුවී තිබේ.

ඒකාබද්ධ විපක්ෂයේ නියෝජ්‍ය ප්‍රධාන සංවිධායක, රත්නපුර දිස්ත්‍රික් පාර්ලිමේන්තු මන්ත්‍රි රංජිත් ද සොයිසා මහතා ප්‍රකාශ කළේ මේ වනවිට අග්‍රාමාත්‍යවරයාට එරෙහි විශ්වාසභංග යෝජනාවට සහාය පළ කිරීම සඳහා පාර්ලිමේන්තුවේත් ආණ්ඩුවෙත් විපක්ෂයේත් සැලකිය යුතු පිරිසක් කැමැත්ත පළකර තිබෙන බවයි.

මීට අමතරව දෙමළ ජාතික සන්ධානයේ පාර්ලිමේන්තු මන්ත්‍රිවරුන් දෙතුන් දෙනකුද විශ්වාසභංග යෝජනාවට සහාය පළකිරීම සඳහා කැමැත්ත ප්‍රකාශ කර තිබෙන බවද රංජිත් ද සොයිසා මන්ත්‍රිවරයා සඳහන් කරයි.

පසුගිය සිකුරාදා හිටපු ජනාධිපති මහින්ද රාජපක්ෂ මහතාගේ ප්‍රධානත්වයෙන් ඒකාබද්ධ විපක්ෂයේ පාර්ලිමේන්තු මන්ත්‍රි කණ්ඩායම් රැස්වීමක් පැවැත්වීමෙන් අනතුරුව අග්‍රාමාත්‍යවරයාට එරෙහි විශ්වාසභංග යෝජනාවට අස්සන් කිරීම ආරම්භ කෙරිණි.

ශ්‍රී ලංකා මහ බැංකුවේ බැඳුම්කර වංචාවට අනුබල දීම, එය නැවැත්වීමට ක්‍රියා නොකිරීම, ශ්‍රී ලංකා මහ බැංකුවේ හිටපු අධිපති අර්ජුන මහේන්ද්‍රන් මහතාට පැන යෑමට ඉඩ ලබාදීම ඇතුළු කරුණු රැසක් මෙම විශ්වාසභංග යෝජනාවට ඇතුළත් කර ඇති බවත් එහි පිටපත් මේ වනවිට ශ්‍රී ලංකා නිදහස් පක්ෂයේ මැති ඇමැතිවරුන්ට හා එක්සත් ජාතික පක්ෂයේ පාර්ලිමේන්තු මන්ත්‍රිවරුන්ගෙන් කොටසකට ලබාදී තිබෙන බවත් රංජිත් ද සොයිසා මන්ත්‍රිවරයා සඳහන් කළේය.

ශ්‍රී ලංකා නිදහස් පක්ෂයේ මැති ඇමැතිවරුන්ද මෙම විශ්වාසභංග යෝජනාවට අස්සන් කිරීම සිකුරාදා දහවල් කාලයේදී ආරම්භ කළ බවත් එක්සත් ජාතික පක්ෂ්යේ මන්ත්‍රින්ගෙන් පිරිසක් මීට අස්සන් කිරීමට නියමිත බවත් රංජිත් ද සොයිසා මන්ත්‍රිවරයා පැවැසීය.


අස්සන් 75ක් පමණ ලැබූ විට ලබන සතියේදී මෙම විශ්වාසභංග යෝජනාව පාර්ලිමේන්තුවට භාරදෙන බවත් රංජිත් ද සොයිසා මහතා සඳහන් කළේය.

එජාප කෘත්‍යාධිකාරය 22වැනිදා රැස්වෙයි

මේ අතර එක්සත් ජාතික පක්ෂයේ කෘත්‍යාධිකාරි මණ්ඩලය ලබන 22 වැනි දින කැඳවීමට නියමිත බව සිරිකොත එජාප මූලස්ථාන ප්‍රකාශකයෙක් පැවැසීය.


එජාප පසු පෙළ මන්ත්‍රිවරුන් පිරිසක් එජාප නායක අග්‍රාමාත්‍ය රනිල් වික්‍රමසිංහ මහතාගෙන් කරන ලද ඉල්ලීමක් මත පක්‍ෂයේ කටයුතු ප්‍රතිසංවිධානය කිරීම සඳහා පක්ෂයේ විශේෂ මහා සම්මේලනයක් කැඳවීම සඳහා වූ ඉල්ලීම සලකා බැලීම, එජාපයෙන් තරග වැදී ජයග්‍රහණය කළ පළාත් පාලන ආයතනවල සභාපතිවරුන් සහ නගරාධිපතිවරුන් නම් කිරීමේදී ඇති වී තිබෙන ගැටලු නිරාකරණය කරගැනීම, මෙවර මැයි දින රැලිය පැවැත්වීම, එළැඹෙන පළාත් සභා මැතිවරණ ජයග්‍රහණය කිරීම සඳහා පක්ෂය සූදානම් කිරීම ඇතුළු කරුණු ගණනාවක් මෙහිදී සාකච්ඡාවට ගැනීමට නියමිතය.

Latest Video

Powered by Blogger.