පාර්ලිමේන්තුවාරය අවසන් කළේ දෝෂාභියෝගයක් නිසා? : විසුරුවන කතාවකුත්!

පාර්ලිමේන්තු වාරය 12 වනදා මධ්‍යම රාත්‍රියෙන් අවසන් කරමින් හදිසි ගැසට් නිවේදනයක් නිකුත් කළේ එළඹෙන 19 වනදා එක්සත් ජාතික පක්ෂයේ පිරිසක් විසින් ජනාධිපතිවරයාට එරෙහිව දෝෂාභියෝගයක් ගෙන ඒමේ සුදානමක් පිළිබඳ වාර්තාවීම නිසා බව දේශපාලන ආරංචිමාර්ග සඳහන් කරයි.

මෙම දෝෂාභියෝගය එක්සත් ජාතික පක්ෂයේ ප්‍රබල අමාත්‍යවරයෙකුගේ මැදිහත්වීම මත නීති ක්‍ෂේත්‍රයට සම්බන්ධ සංස්ථා සභාපතිවරයකු විසින් සකස්කර ඇති බවට ජනාධිපතිවරයාගේ පාර්ශවයට තොරතුරු ලැබී තිබුණු බවද එම ආරංචිමාර්ග වැඩිදුරටත් පෙන්වා දෙයි.

ඒ අනුව අලුත් අවුරුදු නිවාඩුවෙන් පසුව පාර්ලිමේන්තුව එළඹෙන 19 වනදා නැවත රැස්වීමට නියමිතව තිබුණත් ජනාධිපතිවරයා විදෙස්ගතවීම හමුවේ දෝෂාභියෝගය පාර්ලිමේන්තුවට ඉදිරිපත් කිරීම වළක්වාලීම සඳහා පාර්ලිමේන්තු වාරය 12 වනදා මධ්‍යම රාත්‍රියෙන් කඩිනමින් අවසන් කරමින් එය මැයි 08 දක්වා කල් තැබීමට ජනාධිපතිවරයා කටයුතු කර ඇත.

ආණ්ඩුක්‍රම ව්‍යවස්ථාවේ 70 ව්‍යවස්ථාවේ බලතල අනුව අංක 2066/43 අතිවිශේෂ ගැසට් නිවේදනය හරහා ජනාධිපතිවරයා පාර්ලිමේන්තුවාරය අවසන් කිරීම සිදුකර ඇත්තේ ඒ අනුවය.

පාර්ලිමේන්තුව විසුරුවා හැරීමේ අදහසක් ?

දශකයකට ආසන්න කාලයකට පසුව ප්‍රථම වරට පාර්ලිමේන්තුවේ වාර අවසන් කිරීමේ නියෝගය සම්බන්ධයෙන් විමසීමක් කළ අවස්ථාවේ ජනාධිපති ලේකම් ඔස්ටින් ප්‍රනාන්දු මහතා 'බීබීසී සිංහල සේවය'ට කියා සිටියේ, තමන්ට වැටහෙන ආකාරයට මේ අවස්ථාවේ පාර්ලිමේන්තුව විසුරුවා හැරීමේ කිසිදු අදහසක් ජනාධිපතිවරයාට නොමැති බවය.

ජනාධිපතිවරයා විසින් වත්මන් පාර්ලිමේන්තුවේ පළමු සැසිවාරය ඊයේ මධ්‍යම රාත්‍රියේ සිට අවසන් කරමින් අතිවිශේෂ ගැසට් නිවේදනය නිකුත් කරනු ලැබීම සම්බන්ධයෙන් අදහස් දක්වමින් ඔහු එබව කියා සිටියේය.

ආණ්ඩුක්‍රම ව්‍යවස්ථාවේ 70 (1) වගන්තියෙන් පැවරී තිබෙන බලතල ප්‍රකාර ජනාධිපතිවරයා විසින් වත්මන් පාර්ලිමේන්තුවේ වාරය අවසාන කර ඇතැයි පවසන ජනාධිපති ලේකම් ඔස්ටින් ප්‍රනාන්දු මහතා, ඒ සමගම පාර්ලිමේන්තුව නැවත කැඳවන දිනයත් ප්‍රකාශයට පත්කර තිබෙන බව පෙන්වා දුන්නේය.

ලබන මැයි 08 වෙනි දින පාර්ලිමේන්තුව යළි කැඳවනු ලබන්නේ කවර වේලාවක ද යන්න ඉක්මනින්ම දැනුම් දෙන බවත් ජනාධිපති ලේකම්වරයා පවසයි.

ඉතිහාසයේ මෙවන් සිදුවීමක් අවසන් වරට 2009 වසරේදී සිදුවූ අතර, සැසිවාරය අවසන් කිරීමත් සමඟ පාර්ලිමේන්තුවේ උසස් ඉහළ නිලතල කාරක සභාව හා ආංශික අධීක්ෂණ කාරක සභා 16 හැර අනෙකුත් කාරක සභා අහෝසි වනු ඇත.


Latest Video

Powered by Blogger.