අමාත්‍යාංශ ගණන 43ට සීමා වෙයි : බෙදෙන්නේ මෙහෙමයි.


ආණ්ඩුවේ නව අමාත්‍ය මණ්ඩලය දිවුරුම් දීම අද (01දා) පෙරවරු 10.00ට ජනාධිපති ලේකම් කාර්යාලයේදී ජනාධිපති මෛත්‍රීපාල සිරිසේන මහතාගේ ප්‍රධානත්වයෙන් සිදු කිරීමට නියමිතය.

ආණ්ඩුවේ සියලුම  ඇමතිවරුන්ට අද උදෑසන 9.30 වන විට ජනාධිපති ලේකම් කාර්යාලයට පැමිණ සිටින ලෙස ජනාධිපති කාර්යාලයෙන් ඊයේ (30දා) දැනුම් දී ඇති අතර කැබිනට් අමාත්‍යවරුන් පමණක් අද දිනයේදී දිවුරුම් දීමට නියමිත බව වාර්තාවේ.

ජනාධිපති ලේකම්වරයා සහ අග්‍රාමාත්‍ය ලේකම්වරයා එක්ව මෙවර අමාත්‍ය මණ්ඩල සංශෝධනයේදී විද්‍යාත්මක විෂය බෙදීමක් යටතේ අමාත්‍යාංශ නම් කරීම සිදුකර ඇති අතර, ඒ අනුව අමාත්‍යාංශ සංඛ්‍යාව 43ට සීමාකර ඇති බවද වාර්තා වේ.

ඒ අනුව උසස් අධ්‍යාපන හා මහා මාර්ග ලෙස පැවැති අමාත්‍යාංශයක් මුදල් හා ජනමාධ්‍ය ලෙස පැවැති අමාත්‍යාංශයෙත් විෂයයන් වෙනස් වීමට නියමිතය.

බුද්ධ ශාසන අමාත්‍ය ධුරය සඳහා වෙනම අමාත්‍යවරයෙකු පත්කිරීම පිළිබඳවත්, සමෘද්ධි විෂයය එක්සත් ජතික පක්‍ෂයේ අමාත්‍යවරයෙකුට ලබාදීම මෙන්ම ජනමාධ්‍ය අමාත්‍ය ධුරය වෙනස් කිරීමටද සාකච්ඡාවක් සිදුව ඇතැයි වාර්තා වේ.

තවද අධ්‍යාපන අමාත්‍යාංශය සතුව ඇති සංස්කෘතික අමාත්‍යාංශයේ විෂයයන් ඉවත් කර එම විෂයියන් සංස්කෘතික අමාත්‍යාංශයට යටත් කිරීම සිදුවනු ඇති බවද වාර්තා වෙයි.

ආණ්ඩුවෙන් ඉවත්ව මන්ත්‍රීවරුන් පිරිසක් විපක්‍ෂයට යෑම හේතුවෙන් හිස් වූ සමාජ සවිබල ගැන්වීම් හා සුබසාධන, විද්‍යා හා තාක්‍ෂණ, වෘත්තීය පුහුණු, ක්‍රීඩා, කම්කරු හා වෘත්තීය සබඳතා, ආපදා කළමනාකරණ අමාත්‍ය ධුර සඳහා නව අමාත්‍යවරුන් පත්කිරීමට නියමිතය.

මේ අතර, එක්සත් ජාතික පක්‍ෂ පසුපෙළ මන්ත්‍රීවරුන් කිහිපදෙනෙකු නියෝජ්‍ය අමාත්‍යවරුන් ලෙස පත්කිරීමටද සාකච්ඡා වී ඇති අතර රාජ්‍ය සහ නියෝජ්‍ය අමාත්‍යවරුන් පත්කරන අවස්ථාවෙදී ඔවුන්ද පත්කිරීමට නියමිත බව වාර්තාවෙ.

එක්සත් ජාතික පක්‍ෂයේ අමාත්‍යවරුන්ගේ සංශෝධනය මීට පෙර සිදු කළ හෙයින් මෙවර අමත්‍ය මණ්ඩල සංශෝධනයේදී විශාල වෙනස්කම් නොවනු ඇති බව එක්සත් ජාතික පක්‍ෂ ජ්‍යෙෂ්ඨ අමාත්‍යවරයෙක් පැවසීය.

රාජ්‍ය සහ නියෝජ්‍ය අමාත්‍යවරුන් බොහෝදුරට හෙට(02දා) දිවුරුම් දීමට නියමිත බවද වැඩිදුරටත් වාර්තාවේ.

ඉවත්වූ අය ආණ්ඩුවට එන්නේ නෑ 

ආණ්ඩුවෙන් ඉවත් වූ 16 දෙනාගෙන් කිහිප දෙනෙකු හෝ ආණ්ඩුවට එකතු වන බවට සිදු කරන ප්‍රකාශ දවල් හීන දකින්නන්ගේ ප්‍රකාශ බව ශ්‍රී ලංකා නිදහස් පක්‍ෂ මාධ්‍යප්‍රකාශක ඩිලාන් පෙරේරා මහතා සඳහන් කළේය.

එළැඹෙන මැයි 08 වැනිදා 16 දෙනා විපක්‍ෂයේ අසුන් ගන්නා බවත්, මේ නිසා ආණ්ඩුවේ සිටින ශ්‍රී ලංකා නිදහස් පක්‍ෂ කණ්ඩායම් ආණ්ඩුවෙන් ඉවත් වන දිනය තීරණය කළ යුතු බවත් හෙතෙම පවසා සිටියේය.

ආණ්ඩුවෙන් ඉවත් වූ කොටසක් හෝ ආණ්ඩුවට එකතු කර ගැනීමට කටයුතු කරන බවට ඇතැම් පිරිස් පවසන බවත්, එහෙත් 16 දෙනාගෙන් කිසිවෙකුත් ආණ්ඩුවට නැවත එකතු නොවන බවත් ඔහු පවසා සිටියේය.

16 දෙනාම විපක්‍ෂයේ අසුන් ගන්නා බවට පාර්ලිමේන්තුවට දන්වා තිබෙන බවත්,ඕනෑම කෙනෙකුට රෑ හෝ දවල් හීන දැකිය හැකි බවත් ඩිලාන් පෙරේරා මහතා පැවසීය.

Info Sri Lanka TV

Powered by Blogger.