සමෘද්ධි බැංකුවට අගමැතියි - හැරිසනුයි වලි.


කිසියම් වූ හේතුවක් නිසාවත් සමෘද්ධි බැංකුව මහ බැංකුවට පවරා ගැනීමට තමා ඉඩ නොදෙන බව සමාජ සවිබල ගැන්වීම් අමාත්‍ය පී.හැරිසන් මහතා පැවසීය.

එසේම කිසිම දිනක සමෘද්ධි බැංකුව පාඩු ලැබිය නොහැකි බවත් ඔහු ප්‍රකාශ කළේය.

අනුරාධපුර දිස්ත්‍රික් ලේකම් කාර්යාලයේ පැවැති  සමෘද්ධි නිලධාරි හමුවකදී ඔහු මේ බව පවසා සිටියේ පසුගියදා අගමැතිවරයා විසින් කල ප්‍රකාශයක් පිළිබඳව එම රැස්වීමට සහභාගී වූ අයකු කල ප්‍රශ්න කිරිමකදීය.

06දා පැවැති කම්කරු දින සැමරුමේදී එක්සත් ජාතික පක්ෂ නායක අග්‍රාමාත්‍ය රනිල් වික්‍රමසිංහ මහතා පැවසුවේ සමෘද්ධි බැංකුව මහ බැංකුව යටතට පත් කරන බවයි.

මේ සම්බන්ධයෙන් තවදුරටත් අදහස් දැක්වූ ඇමතිවරයා මෙසේද පැවසිය.

“මොනම හේතුවක් නිසාවත් සමෘද්ධි බැංකුව මහ බැංකුවට පවරා ගැනීමට මම ඉඩ දෙන්නේ නැහැ.එහෙම අවශ්‍යතාවයකුත් නැහැ. ඒ පිළිබඳව කිසිම කෙනෙක් සැකයක් බයක් තියා ගන්න අවශ්‍ය නැහැ. මට දුන්න වගකීම මම උපරිමයෙන් කරන්න බලාපොරොත්තු වෙනවා.

මම සේවකයාගේ රස්සාවේ ස්ථිරභාවය ආරක්ෂා කරන්නම්, කළමනාකරුවන්ගේ ස්ථිර භාවයත් විශ්‍රාම වැටුපත් ඇති කරන්නම්. හැබැයි වැඩ කිරිම තියෙන්න ඕනේ, ආයේ සමෘද්ධි බැංකු පාඩු ලබන්නත් බැහැ, බැංකුව පාඩු ලැබුවොත් කළමණාකරුත්, අධ්‍යක්ෂකත් වගකිව යුතුයි. එහෙම පාඩු ලබන්න බැහැ. අලුතින් හිතන්න ඕනේ.” යයි ඇමතිවරයා කියා සිටියේය.

'මහ බැංකුව සිදුකරනු ඇත්තේ සමෘද්ධි බැංකුවේ දැනට පවතින නියාමනය තවත් ශක්‌තිමත් කිරීම සඳහා සහාය වීමක්‌' - ශ්‍රී ලංකා මහ බැංකුව

කෙසේවුවද සමෘද්ධි බැංකු ක්‍රියාවලියෙහි කාර්යක්‍ෂමතාව වැඩිදියුණු කිරීම සඳහා අගමැති රනිල් වික්‍රමසිංහ මහතා යටතේ ඇති ජාතික ප්‍රතිපත්ති හා ආර්ථික කටයුතු අමාත්‍යාංශ ලේකම්වරයාගේ ප්‍රධානත්වයෙන් කමිටුවක් පත් කිරීමට තීරණය කර තිබේ.

අගමැති රනිල් වික්‍රමසිංහ හා බැංකු අධිකාරි ආචාර්ය ඉන්ද්‍රජිත් කුමාරස්වාමි මහතා ඇතුළු පිරිසකගේ සහභාගිත්වයෙන් පැවැති සාකච්ඡාවකදී එම තීරණය ගෙන ඇත.

ඒ අනුව සමෘද්ධි බැංකුව මහ බැංකුව යටතට පවරා ගැනීමක් සිදු නොකරන බව ශ්‍රී ලංකා මහ බැංකුවේ නියෝජ්‍ය අධිපති කේ. ඩී. රණසිංහ මහතා ද අවධාරණය කර සිටියි.

 මහ බැංකුව සිදුකරනු ඇත්තේ සමෘද්ධි බැංකුවේ දැනට පවතින නියාමනය තවත් ශක්‌තිමත් කිරීම සඳහා සහාය වීමක්‌ බවද ඒ මහතා සඳහන් කළේය. 

හෙතෙම මේ බැව් පැවසුවේ මහ බැංකු අධිපති  ආචාර්ය ඉන්ද්‍රජිත් කුමාරස්‌වාමි මහතාගේ ප්‍රධානත්වයෙන් 11දා මහ බැංකුවේ පැවැති ප්‍රවෘත්ති සාකච්ඡාවේදීය.

මහ බැංකුවේ දැනට පවතින නියාමන ක්‍රියාවලිය තවදුරටත් ශක්‌තිමත් කිරීම සඳහා මහ බැංකුවට ඵලදායී කාර්යභාරයක්‌ ඉටු කළ හැකි බව මෙහිදී මහ බැංකු අධිපති ආචාර්ය ඉන්ද්‍රජිත් කුමාරස්‌වාමි මහතාද කීවේය. 

Info Sri Lanka TV

Powered by Blogger.