මැයි දිනයත් වර්ජනය කර, රවී අලුත් පොටකට එයි.


එක්සත් ජාතික පක්ෂයේ උප නායක හා එම පක්ෂයේ කොළඹ දිස්ත්‍රීක් නායක රවී කරුණානායක මන්ත්‍රීවරයා ඊයේ (06) කොළඹ සුගතදාස ක්‍රීඩාංගනයේ පැවති එජාප මැයි දින රැලිය වර්ජනය කර ඇත්තේ අගමැතිවරයා ඔහුට දුන් පොරොන්දුවක් මෙතෙක් ඉටුනොකිරිම සම්බන්ධයෙන් විරෝධය පළකිරීම සඳහා යයි දේශපාලන ආරංචි මාර්ග සඳහන් කරයි.

ඒකාබද්ධයෙන් අගමැතිවරයාට එරෙහිව විශ්වාස භංග යෝජනාව ඉදිරිපත් වූ අවස්ථාවේදී එය පරාජය කිරීමට විශාල කාර්ය භාරයක් සිදුකල ඔහුට ඇමති ධුරයක් ලබාදෙන බවට අගමැතිවරයා ලිඛිත පොරොන්දු වී තිබුන බවද එම ආරංචි මාර්ග පවසයි.

එහෙත්, මෙවර කැබිනට් සංශෝධනයේදී අමාත්‍ය ධුරයක් සඳහා තමාව නිර්දේශ නොකිරීම සම්බන්ධයෙන් රවී කරුණානායක මන්ත්‍රීවරයා බලවත්සේ කනස්සල්ලට පත්ව සිටින බවත් ඉදිරි දින කිහිපයේදී ඔහු බරපතල දේශපාලන තීන්දුවක් ගැනීමට නියමිත බවත් ඉහත ආරංචිමාර්ග වැඩිදුරටත් පවසයි.

නීතිපතිගේ නිර්දේශයක් ?

කෙසේවුවද කල විමසීමකදී එජාප ජ්‍යෙෂ්ඨ අමාත්‍යවරයකු පැවසුයේ, මුදල් ඇමතිව සිටි රවී කරුණානායක මහතා බැඳුම්කර චෝදනාවලින් නිර්දෝෂී කරමින් නීතිපතිවරයා ගෙන් නිර්දේශයක් ලැබුන වහාම ඔහුට අමාත්‍ය ධුරයක් ලබාදෙන බවට අගමැතිවරයා සහතික වී ඇති බවයි.

කෙසේවුවද මහ බැංකු බැඳුම්කර සිද්ධිය සම්බන්ධයෙන් සොයා බැලු ජනාධිපති කොමිසම රවී කරුණානායක මහතා ඊට වගකිව යුතු බවට සඳහන් කර නොමැත.

එසේම, මහ බැංකු බැඳුම්කර නිකුත් කිරීමේ සිද්ධියට එක්‌සත් ජාතික පක්‌ෂයේ මන්ත්‍රීවරුන් සම්බන්ධ වූවේදැයි සොයා බැලීමට එම පක්‌ෂය විසින් පත් කළ මාරපන කමිටුවේ වාර්තාව මගින්ද රවී කරුණානායක මහතා නිර්දොශිකර තිබිණ.

ජනපතිගේ බලපෑමක් නැහැ :

හිටපු අමාත්‍ය රවී කරුණානායක මහතාට ඇමති ධුරයක් ලබාදීමට අගමැතිවරයා නිර්දේශ කර ඇතත් ජනාධිපතිවරයා ඊට විරෝධය පළකර ඇතැයි පලවන වාර්තා සම්බන්ධයෙන් ජනාධිපති කාර්යාලයේ ජ්‍යෙෂ්ඨ නිලධාරියකුගෙන් කල විමසීමේදී ඔහු කියා සිටියේ අගමැතිවරයා ගෙන් එවැනි නිදේශයක් මෙතෙක් ලැබී නැති බවයි.

Latest Video

Powered by Blogger.