Ad
Ad

සජිත්ගේ හෙවනැල්ලකට රනිල් හොඳටම බය වෙලා?



එක්සත් ජාතික පක්ෂයේ නියෝජ්‍ය නායක සජිත් ප්‍රේමදාස මහතාගේ නිවාස සහ ඉදිකිරීම් අමාත්‍යංශය යටතේ පවතින සංස්ථා ඇතුළු ආයතනවල සභාපතිවරුන් පිරිසක් කොළඹ බත්තරමුල්ලේ “වෝටර්ස් එජ්” හෝටලයේදී අඟහරුවාදා (07) රාත්‍රියේ හමුවී සාජ්ජයක් පැවැත්වීම සම්බන්ධයෙන් අග්‍රාමාත්‍ය රනිල් වික්‍රමසිංහ මහතා මහත් කලබලයකට පත්ව තිබේ.

මේ අවස්ථාවට අග්‍රාමාත්‍ය හිටපු පෞද්ගලික ලේකම් සුදත් චන්ද්‍රසේකර සහ සජිත් ප්‍රේමදාස මහතාගේ සමීපතමයකු වන නීතීඥ ගුණරත්න වන්නිනායක යන මහත්වරුන් ද එක්ව ඇත.

අග්‍රාමාත්‍ය රනිල් වික්‍රමසිංහ මහතාගේ උපදේශකයකු ලෙස සමාජය ඉදිරියේ පෙනී සිටින පුද්ගලයකු මේ සිද්ධිය දැන ගත් වහාම සිදු කර තිබෙන්නේ, සජිත් ප්‍රේමදාස මහතා 2020 ජනාධිපති අපේක්ෂකයා කරවීමේ කුමන්ත්‍රණකාරී සාකච්ඡාවක් කොළඹ බත්තරමුල්ලේ “වෝටර්ස් එජ්” හෝටලයේදී සිදු කෙරෙමින් පවතින බව කියමින් ගින්නක් පත්තු කර අග්‍රාමාත්‍යවරයා නොමඟ යැවීමය.

සුපුරුදු පරිදි සිය උපදේශකයාගේ අපූරු ආරංචියට රැවටී,මේ වගේ රහස් තොරතුරු ලබාදීම සම්බන්ධයෙන් ඔහුට ස්තුතිය ද පුද කර ඇති අග්‍රාමාත්‍ය රනිල් වික්‍රමසිංහ මහතා සිදු කර තිබෙන්නේ එම සාජ්ජය සංවිධානය කළ බව කියන නිවාස සහ ඉදිකිරීම් අමත්‍යංශය යටතේ පවතින ආයතනයක සභාපතිවරයෙකුට ඒ මොහොතේම දුරකතනයෙන් කතා කර බැන වැදීමය.

එක්සත් ජාතික පක්ෂයේ ජනාධිපති අපේක්ෂකයා සම්බන්ධයෙන් සාකච්ඡා කෙරුණා දැයි ඔහුගෙන් විමසා ඇති අග්‍රාමාත්‍ය රනිල් වික්‍රමසිංහ මහතා, එම ස්ථානයේ ඇත්තටම සිදු වන්නේ කුමක් ද කියා සොයා බැලීම සඳහා වහාම ක්‍රියාත්මක වන පරිදි සිය චර පුරුෂයින් කිහිපදෙනකු ද “වෝටර්ස් එජ්” හෝටලයට යවා ඇත.

මේ අවස්ථාවට එක්වූ අයගේ නාම ලේඛනයක් තමාට ලබා දෙන්න යැයි ද අග්‍රාමාත්‍ය රනිල් වික්‍රමසිංහ මහතා මේ වන විටත් නියෝග කර තිබේ.

මේ ආයතන ප්‍රධානීන් එක් වී සාකච්ඡා කර ඇත්තේ එක්සත් ජාතික පක්ෂයට හිතවත් සංස්ථා සභාපතිවරුන්ගේ සංසදයක් පිහිටුවා ගෙන පක්ෂයට සහ නායකයාට උදව් උපකාර කරන අතර සිය ප්‍රශ්න ද විසඳා ගැනීම සම්බන්ධයෙනි.

කෙසේ නමුත් මේ අවස්ථාවට එක්වූ වහාම සුදත් චන්ද්‍රසේකර මහතා එහි සිටි පිරිසක් සමග කියා ඇත්තේ සද්භාවයෙන් යුතු කුමන අරමුණක් ඇතිව මේ හමුව සංවිධානය කළත් මේ ගැන ආරංචි වූ වහාම අග්‍රාමාත්‍ය රනිල් වික්‍රමසිංහ මේ සියලු දෙනා ද්‍රෝහීන් සහ කුමන්ත්‍රණකරුවන් ලෙස සලකන බවය.

අග්‍රාමාත්‍ය රනිල් වික්‍රමසිංහ මහතා අදාළ සංස්ථා සභාපතිවරයාට දුරකතනයෙන් කතා කර බැන වැදීමෙන් පසුව සාජ්ජය එකම මළ ගෙයක් බවට පත්ව ඇති අතර සියලු දෙනාම එම ස්ථානයෙන් වහාම විසිර ගොස් ඇත.

[Lankanewsweek]

No comments:

Powered by Blogger.