Ad

රනිල් දෙමළ සන්ධානයට දුන් පොරොන්දු මෙන්න.

උතුරු නැගෙනහිර පළාත්වල කිසිදු කටයුත්තක් දෙමළ ජාතික සන්ධානයේ අනුදැනුමකින් තොරව සිදුනොකරන බවට එක්සත් ජාතික පෙරමුණේ නායක රනිල් වික්‍රමසිංහ වූ පොරොන්දුව මත තම සන්ධානයේ සහාය හිටපු අගමැතිවරයාට ලබා දුන් බව දෙමළ ජාතික සන්ධානය පවසයි.

එක්සත් ජාතික පෙරමුණට සහාය දීම වැදගත් ඉල්ලීම් ගණනාවක් ඉදිරිපත් කළ බවත් සිය ඉල්ලීම් කෙරෙහි රනිල් වික්‍රමසිංහ මහතාගේ පූර්ණ එකඟතාව පළවූ බවත් දෙමළ ජාතික සන්ධාන පාර්ලිමේන්තු මන්ත්‍රී ධර්මලිංගම් සිද්ධාර්ථන් මහතා පැවසීය.

එක්සත් ජාතික පෙරමුණට සහය පළකිරීමේ ලිපිය ලබාදීමෙන් පසු තම ඉල්ලීම් පිළිබඳ සාකච්ඡා කිරීම සඳහා ආර්.සම්බන්ධන් ප්‍රමුඛ දෙමළ ජාතික සන්ධානයේ පාර්ලීමේන්තු කණ්ඩායම 29 දා සවස 4.30 ට පමණ අරලියගහ මන්දිරයේදි රනිල් වික්‍රමසිංහ මහතා හමුවී සාකච්ඡා කර තිබේ.

එම හමුවේදි දෙමළ ජාතික සන්ධානය ලබාදෙන සහය වෙනුවෙන් නව ආණ්ඩුක්‍රම ව්‍යවස්ථාවක් ගෙන ඒමින් ජාතික ගැටළුවට විසඳුම් ගෙන ඒම,ත්‍රස්තවාදය වැළක්වීමේ පනත අහෝසි කිරීම,දෙමළ දේශපාලන සිරකරුවන් නිදහස් කිරීම, උතුරේ ආරක්ෂක හමුදාව බාරයේ ඇති ඉඩම් නිදහස් කිරීම වශයෙන් ඉල්ලීම් ගණනාවක් ඇතුළත් ලැයිස්තුවක් ඉදිරිපත් කළ අතර ඒ සියලු ඉල්ලීම් ඉටුකරන බවට රනිල් වික්‍රමසිංහ මහතා පොරොන්දු වූ බව දෙමළ ජාතික සන්ධානය කියා සිටියි. 

මෙම ඉල්ලීම් සම්බන්ධයෙන් දිගින් දිගටම සාකච්ඡා කිරීමටත් එකඟවී ඇති අතර තම පක්ෂයේ සහය ඇතිව පිහිටුවනු ලබන නව ආණ්ඩුවේ තනතුරු ලබා නොගත්තද උතුරු නැගෙනහිර කිසිදු ක්‍රියාවක් දෙමළ ජාතික සන්ධානයේ අවසරයකින් තොරව සිදුනොකළ යුතු බවට කරන ලද ඉල්ලීම එලෙසින්ම ඉටුකරන බවත් රනිල් වික්‍රමසිංහ මහතා ප්‍රකාශ කර ඇත.

මෙම හමුවට සිවඥානම් සිරිධරන් හා එස්.සිවමෝහන් යන පාර්ලිමේන්තු මන්ත්‍රීවරන් දෙදෙනා හැර දෙමළ ජාතික සන්ධානයේ පාර්ලිමේන්තු මන්ත්‍රීවරුන් 12 දෙනෙකු සහභාගී වී තිබේ.

තීරණයට ටෙලෝ සංවිධානයේ අප්‍රසාදය

එක්සත් ජාතික පෙරමුණට සහාය දීමට දෙමළ ජාතික සන්ධානය විසින් ගනු ලැබූ තීරණයට දැඩි අප්‍රසාදය පලකරන ටෙලෝ සංවිධානය සහාය දුන් මන්ත්‍රීවරුන් දෙදෙනාගේ සහාය ඉල්ලා අස්කර ගැනීමටද කටයුතු කරන බව සඳහන් කර සිටීයි.

දෙමළ ජාතික සන්ධානයේ හවුල්කාර පක්ෂයක් වන ටෙලෝ සංවිධානයේ නායක සෙල්වම් අඩෙයිකලනාදන් හා නියෝජිත කවින්ද්‍රන් කෝඩිස්වරන් යන මන්ත්‍රීවරුන් විසින් එක්සත් ජාතික පෙරමුණට සහාය පළ කර තිබේ.

දෙමළ ජාතික සන්ධානයේ මෙම තීරණය හේතුවෙන් ටෙලෝ සංවිධානයේ මධ්‍යම කාරක සභා රැස්වීමද හදිසියේම සෙනසුරාදා (01)වැනි දා වව්නියාවේදී කැදවා තිබේ.

දෙමළ ජාතික සන්ධානය මෙම තීරණය ගත යුතුව තිබුණේ පක්ෂ සම්බන්ධීකරණ කමිටු තීරණයකට අනුව මිස පාර්ලිමේන්තු කණ්ඩායම් තීරණයකට අනුව නොවන බවත් මෙකී තීරණය පිළිනොගන්නා බවත් ටෙලෝ සංවිධානයේ උප සභාපති හිටපු උතුරු පළාත් සභා මන්ත්‍රී එම්.කේ.සිවාජිලිංගම් මහතා පැවසීය

වත්මන් දේශපාලන තත්ත්වය මැද මහින්ද පරද්දනවාද රනිල් දිනවද කියල හිතල කටයුතු කිරීම සුදුසු නැහැ. දෙමළ ජනතාවගේ ප්‍රශ්න ගැන මේ යූ.එන්.පී ආණ්ඩුවට සහාය වෙලා අවුරුදු තුනහමාරක් දෙමළ ජාතික සන්ධානය කටයුතු කළත් ඒ ප්‍රශ්න විසදා දෙන්න පුළුවන් වුණේ නැහැ.ඒ ආණ්ඩුව ගැන අපටත් දෙමළ ජනතාවටත් කිසිදු විශ්වාසයක් නැහැ.

මේ ගැන කටයුතු කරන්නෙ කොහොමද කියල සාකච්ඡා කර තීරණය කරන්න දෙමළ ජාතික සන්ධානයේ පක්ෂ සම්බන්ධීකරණ කමිටු රැස්වීම කැඳවන්න කියල අපි සන්ධානයේ නායකත්වයෙන් ඉල්ලුවා. එහෙත් එහෙම කළේ නැහැ. මහින්ද ද රනිල් ද කියල බලන්නේ නැතුව දෙමළ ජාතික සන්ධානය මේ දෙපාර්ශවය එක්කම දෙමළ ජනතාවගේ ප්‍රශ්න ගැන කතා කරන්න තිබුණා. ඒ ප්‍රශ්ණ විසඳා දෙනවා කියල පිළිගන්න පුළුවන් පොරොන්දුවක් දෙන පාර්ශවයකට සහාය දෙන්න තිබුණා.


එක්සත් ජාතික පෙරමුණට සහාය පල කරල දෙමළ ජාතික සන්ධානයේ 14 දෙනෙකු අත්සන් කරල තියෙනවා. අපි අපේ පක්ෂය නියෝජනය කරමින් මීට අත්සන් තැබූ දෙදෙනාගේ සහාය ඉල්ලා අස්කර ගැනීමට බලකරනවා. පක්ෂයේ පොදු අදහසට විරුද්ධව පක්ෂ නායකත්වයත් පක්ෂයේ නියෝජිතයිනුත් කටයුතු කරන්නෙ නැහැ,යැයිද සිවාජිලිංගම් මහතා කීය.

No comments:

Powered by Blogger.