මන්ත්‍රී දුමින්ද අයවැයට පක්ෂයි: පොහොට්ටුවෙන් අද ශ්‍රීලනිපයට අභියෝගයක්!


ශ්‍රී ලංකා නිදහස් පක්ෂයේ සභාපති සහ නායක ලෙස ජනාධිපති මෛත‍්‍රීපාල සිරිසේන කටයුතු කරන ආණ්ඩුව ගෙනෙන අයවැයට විරුද්ධවීමේ හැකියාවක් ශ්‍රී ලංකා නිදහස් පක්ෂයට නොමැති බව එම පක්ෂයේ ජාතික සංවිධායක පාර්ලිමේන්තු මන්ත්‍රී දුමින්ද දිසානායක පවසයි.

නොච්චියාගම ප්‍රදේශයේ පැවති වැඩසටහනකට සහභාගීවීමෙන් අනතුරුව මාධ්‍ය වෙත අදහස් දක්වමින් මන්ත්‍රීවරයා මේ බව සඳහන් කල අතර ආණ්ඩුවේ ප‍්‍රධානියා හා කැබිනට් මණ්ඩලයේ ප‍්‍රධානියා ජනාධිපතිවරයා බවත් ඔහු ප‍්‍රධානියා වන කැබිනට් මණ්ඩලය විසින් අනුමත කර ඇති අයවැයට විරුද්ද වීමට හැකියාවක් කොහෙත්ම නොමැති බවද මන්ත්‍රීවරයා අවධාරණය කර සිටියි.

එහිදී දුමින්ද දිසානායක මන්ත්‍රීවරයා වැඩිදුරටත් සඳහන් කර සිටියේ මෙවර අයවැය තුළ ජනාධිපතිගේ ප්‍රතිපාදන ඉතා ඉහළින් ලබාදී ඇති බවය. එසේම එහි කිසිඳු අඩුවක් නොමැති බවත් වැදගත් සහ යහපත් යෝජනා රැසක් මෙවර අයවැය තුල අන්තර්ගතව ඇති බැවින් තමන් සිටින්නේ විපක්ෂයේ නිසා කොහොමත් අයවැයට විරුද්ධ විය යුතුය යන ස්ථාවරයේ තමන් නොමැති බවද ඔහු පවසයි.

එහෙත් අයවැය යෝජනා අතර කිසියම් දෝෂයක් ඇත්නම් එය පෙන්වාදීම වරදක් නොවන බවද අමාත්‍යවරයා පවසයි.

අයවැයට එරෙහිවී විශ්වාසය පලකරන්න

මේ අතර ශ්‍රී ලංකා නිදහස් පක්‍ෂය සම්බන්ධයෙන් විශ්වාසයක් ඇතිකර ගැනීම සඳහා අයවැය පරාජය කිරීමට එකඟවිය යුතු බවට වූ යෝජනාවක් ශ්‍රී ලංකා පොදුජන පෙරමුණ (පොහොට්ටුව) විසින් අද දිනයේ ඉදිරිපත් කිරීමට නියමිතව බව එම පක්ෂයේ අභ්‍යන්තර ආරංචිමාර්ග පවසයි.

ශ්‍රී ලංකා නිදහස් පක්‍ෂය සහ ශ්‍රී ලංකා පොදුජන පෙරමුණ (පොහොට්ටුව) අතර දෙවන සාකච්ඡාව අද (21) පෙරවරුවේ විපක්‍ෂ නායක කාර්යාලයේදී පැවැත්වීමට නියමිත අතර එහිදී මේ සම්බන්ධ යෝජනාව ඉදිරිපත් කෙරෙනු ඇතිබව ඉහත ආරංචිමාර්ග වැඩිදුරටත් පවසයි.

ශ්‍රී ලංකා නිදහස් පක්ෂය ඉදිරියේදී අයවැයට විරුද්ධව ඡන්දය ප්‍රකාශ කරනු ඇතැයි තමන් අපේක්ෂා කරන බව විපක්ෂ නායක මහින්ද රාජපක්ෂ මහතා ඊයේ (20) ප්‍රකාශ කළේය.

විපක්ෂ නායකවරයා මේ බව ප්‍රකාශ කළේ තංගල්ල ප්‍රාදේශීය සභාවේ පැවති උත්සවයකදීය.

කෙසේවුවද ශ්‍රී ලංකා නිදහස් පක්‍ෂය සහ ශ්‍රී ලංකා පොදුජන පෙරමුණ අතර අද පැවැත්වෙන හමුවේදී ඉදිරි ජනාධිපතිවරණය සහ මහමැතිවරණයට තරග වැදීම සඳහා දෙපාර්ශ්වය අතර පිහිටුවීමට නියමිත නව සන්ධානය පිළිබඳව මෙහිදී සාකච්ඡා කෙරෙනු ඇති බව වාර්තාවේ.

මේ සම්බන්ධයෙන් ඉකුත් 14 වැනිදා පළමුවරට ශ්‍රී ලංකා නිදහස් පක්‍ෂය සහ ශ්‍රී ලංකා පොදුජන පෙරමුණ සාකච්ඡා ආරම්භ කළේය.

නව සන්ධානයක් පිහිටුවීම සම්බන්ධයෙන් අද පැවැත්වෙන සාකච්ඡාව තීරණාත්මක වනු ඇති බව ශ්‍රී ලංකා නිදහස් පක්‍ෂයේ මහලේකම් පාර්ලිමේන්තු මන්ත්‍රී දයාසිරි ජයසේකර මහතා 'නෙත් නිවුස් 'වෙත අද උදැසන ප්‍රකාශකර සිටියේය. 

පොහොට්ටුවෙන් සමාජ මාධ්‍යය මෙහෙයුමක් !

මේ අතර පොහොට්ටු පක්ෂයේ නිර්මාතෘ බැසිල් රාජපක්ෂ මහතා පවසන්නේ, ශ්‍රී ලංකා පොදුජන පෙරමුණ (පොහොට්ටුව) හා ශ්‍රී ලංකා නිදහස් පක්ෂය අතර එකඟතාවයක් ඇති වුවත් නැතත් ඉදිරියේ පැවැත්වෙන ඕනෑම මැතිවරණයක් ජයගැනීමේ හැකියාව ශ්‍රී ලංකා පොදුජන පෙරමුණට පවතින බවයි.

ශ්‍රී ලංකා පොදුජන පෙරමුණේ පළාත් පාලන ආයතන නියෝජිතයින් හා ඒ මහතා අතර එහි පක්ෂ කාර්යාලයේ පැවැති හමුවකදී ඔහු මේ බව සඳහන් කර සිටියේය.

එසේම, පොහොට්ටු පක්ෂයට හිතවත් සමාජ මාධ්‍ය පුළුල් ප්‍රචාරයක් ලබාදෙමින් පවසන්නේ ඕනෑම මැතිවරණයක් තනිවම තරඟ කර ජයග්‍රහණය කිරීමට පොහොට්ටුවට හැකියාව ඇති බවයි.

කෙසේවුවද අද පැවැත්වෙන සාකච්ඡාවේදී ගන්නා තීන්දු තීරණ පිළිබඳව ඒකාබද්ධ ප්‍රකාශයක් නිකුත් කිරීමට ශ්‍රී ලංකා නිදහස් පක්‍ෂය සහ ශ්‍රී ලංකා පොදුජන පෙරමුණ තීරණය කර ඇත.

දෙපාර්ශ්වය විසින් පවත්වනු ලබන සාකච්ඡාවලින් අනතුරුව දෙපාර්ශ්වයේ ඇතැම් පිරිස් විසින් කරන ලද විවිධ ප්‍රකාශ හේතුවෙන් ගොඩනඟන පුළුල් සන්ධානයට ඇතිවිය හැකි යම් යම් බාධා නැවැත්වීම සඳහා මෙම පියවර ගත් බව 19 දා ශ්‍රී ලංකා නිදහස් පක්‍ෂ මූලස්ථානයේ පැවැති මාධ්‍ය හමුවකට සහභාගි වෙමින් සන්ධාන පාර්ලිමේන්තු මන්ත්‍රී රංජිත් සියඹලාපිටිය මහතා පැවසිය.


ජනාධිපති අපේක්ෂකයා සිරිසේන !

මේ අතර එළඹෙන ජනාධිපතිවරණයේ ශ්‍රී ලංකා නිදහස් පක්ෂයෙන් ඉදිරි ජනාධිපතිවරණය සඳහා ඉදිරිපත්වන අපේක්ෂකයා විය යුත්තේ වත්මන් ජනපති මෛත්‍රීපාල සිරිසේන මහතා බවද ඔහු පැවසීය.

කිසියම් හෝ හේතුවකින් තමන් ජනාධිපතිවරණයට ඉදිරිපත් නොවන බව සිරිසේන ජනාධිපතිවරයා විසින් ප්‍රකාශයක් ඉදිරිපත් කළහොත් පමණක් ඒ සඳහා වෙනත් අපේක්ෂකයෙකු ඉදිරිපත් කරන බවත් එහිදී මන්ත්‍රීවරයා පවසා ඇත.

No comments:

Ad
Powered by Blogger.