මම සුදානම්! සජිත් කියයි: එජාපයේ ගැටුම්.


එළැඹෙන ජනාධිපතිවරණයට එජාපයෙන් සජිත් ප්‍රේමදාස මහතා ඉදිරිපත් කිරීම සදහා මලික් සමරවික්‍රම මහතාගේ ප්‍රධානත්වයෙන් යම් උත්සාහයක් දියත් වෙමින් ඇති නිසා එජාප අභ්‍යන්තරයේ උණුසුම් තත්ත්වයක් නිර්මාණය වී ඇතැයි වාර්තා වේ.

මේ අනුව පසුගිය සතියේ මුල මලික් සමරවික්‍රම සහ සජිත් ප්‍රේමදාස මහතුන් අතර හමුවක් පැවතී ඇත.

එම හමුවට හේතුව වී ඇත්තේ ජනාධිපතිවරණයක් අබියසදී එජාපය සාමාන්‍යයෙන් කරනු ලබන ජනමත විමසුමේ ප්‍රතිඵල නිකුත් වීමය.

එම ප්‍රතිඵලයට අනූව පක්ෂයේ සිටින ජනප්‍රියම නායකයා ලෙස සජිත් ප්‍රේමදාස නම් වී ඇත. ඒ අනූව එජාපයට ජයග්‍රහණය කිරීමට නම් සජිත් ප්‍රේමදාස ට අපේක්ෂකත්වය ලබාදිය යුතු යැයි යන මතයට මලික් සමරවික්‍රම ඇතුළු පක්ෂයේ ජේෂ්ඨයන් කිහිපදෙනකු පැමිණ ඇතැයි වාර්තා වේ.

මෙම අලුත් තත්ත්වය නිසා සාගල රත්නායක ආදී රනිල් හිතවාදීන් නොසන්සුන් වී ඇතැයිද එම තත්ත්වය පුපුරා යමින් පසුගිය 28 වැනිදා පැවති කැබිනට් රැස්වීමේදී ත්‍රිකුණාමලයේ වරාය සතු ඉඩමක් වානේ කම්හලක් ඉදිකිරීම සදහා නිදහස් කරගැනීමට මලික් සමරවික්‍රම මහතා ඉදිරිපත් කර තිබූ යෝජනාවකට අමාත්‍ය සාගල රත්නායක දැඩි විරෝධයක් දක්වා ඇති බවද වාර්තා වේ.

මෙම අලුත් තත්ත්වය සමග අගමැති රනිල් වික්‍රමසිංහ මහතා එජාපයේ පසුපෙළ මන්ත්‍රීවරුන් මුණගැසීමට තීරණය කර ඇත. ඒ අනුව එහි පළමු හමුව ලෙස සිඩ්නි ජයරත්න , සන්දිත් සමරසිංහ , හෙක්ටර් අප්පුහාමි, ආදී පසුපෙළ මන්ත්‍රීවරුන් 15 දෙනෙකු පමණ පසුගිය 29 වැනිදා අරලියගහ මන්දිරයේ දී මුණගැසී ඇත. මීට අමතරව පසුගිය 25 වැනිදා සිවිල් සංවිධාන නායකයන් සමග ද අරලියගහ මන්දිරයේ දී අගමැතිවරයා සාකච්ඡාවක් පවත්වා ඇත.

ජනතා පැතුම් ඉටුකරන්න සූදානම් - සජිත්

මේ අතර රටේ ඉදිරිගමන, නායකත්වය හා ජාතික වැඩපිළිවෙල තීරණය කිරීමට මෙම වසරේදී ජනතාවට අවස්ථාව හිමිවන බවත් රණසිංහ ප්‍රේමදාස නාමයෙන් එම ජනතා බලාපොරොත්තු ඉටු කිරීමට තමන් ඇප කැප වන බවත් නිවාස, ඉදිකිරීම් හා සංස්කෘතික කටයුතු අමාත්‍ය සජිත් ප්‍රේමදාස පවසයි.

දූෂණයෙන් හා වංචාවෙන් තොර පොඩි මිනිසා රජ කරවන කාර්යශූර, අවංක රාජ්‍ය පාලකයෙකු බිහිකිරීම ජනතාවගේ එකම බලාපොරොත්තුව බවත්, එම ජනතා පැතුම ඉටු කිරීමට රණසිංහ ප්‍රේමදාස නාමයෙන් අප අත්වැල් බැඳගෙන කටයුතු කරන බවත් අමාත්‍යවරයා සඳහන්කර සිටියි.

රාජ්‍ය සම්පත් භාවිතා කළ යුත්තේ පාලකයින්ගේ සුඛවිහරණය උදෙසා නොව රටේ අසරණ පොදු ජනතාවගේ සුඛවිහරණය උදෙසා බැවින් පාලකයින් රටේ සම්පත් අඩුවෙන් භාවිතා කළයුතු බවත්, අමාත්‍යවරයා පවසා තිබේ.

අපේ රට සිංගප්පූරු රට මෙන් දියුණු තත්ත්වයට පත් කිරීම ජනතාවගේ එකම බලාපොරොත්තුව බවත්, 2019 වසර එම ගමනේ හැරවුම් ලක්ෂය බවට පත් කිරීමට ජනතාවට අවස්ථාව හිමිවන බවද අමාත්‍යවරයා පැවසීය.

සජිත් ප්‍රේමදාස අමාත්‍යවරයා මෙම අදහස් පළ කළේ කුරුණෑගල දිස්ත්‍රික්කයේ, ඇහැටුවැව, ඇතිනිමලේ ඉදිකළ “ගජමුතුගම” උදා ගම්මානය ජනතා අයිතියට පත්කිරීමේ අවස්ථාවට සහභාගී වෙමිණි. “සැමට සෙවණ” යළි පිබිදෙන උදා ගම්මාන වැඩසටහන යටතේ ජනතා අයිතියට පැවරුණු 193 වන ආදර්ශ ගම්මානය මෙය වේ.

“ගජමුතුගම” උදා ගම්මානය නිවාස 28 කින් සමන්විත වන අතර එය අංග සම්පූර්ණව ඉදිකිරීම සඳහා වැයකළ මුදල රුපියල් ලක්ෂ 379 කි. පිරිසිදු පානීය ජලය, විදුලිය, ප්‍රවේශ මාර්ග හා විධිමත් අභ්‍යන්තර මාර්ග ඇතුළු සියලු යටිතල පහසුකම්වලින් මෙය සමන්විත වේ.

 උදා ගම්මානය ජනතා අයිතියට පත්කිරීමට සමගාමීව නිවාසලාභීන් 28 දෙනාට නිවාස හිමිකම් පත්‍ර ප්‍රදානය හා රුපියල් ලක්ෂ 224 ක් වටිනා සංවර්ධිත බිම් කොටස් 28 ක හිමිකම නොමිලේ ලබාදීම, ප්‍රදේශයේ අඩු ආදායම්ලාභී පවුල් 325 කට රුපියල් ලක්ෂ 756 ක් වටිනා ‘විසිරි නිවාස ණය’, පවුල් 126 ක් සඳහා රුපියල් ලක්ෂ 630 ක් වටිනා ‘ග්‍රාමශක්ති’ නිවාස අධාර, ප්‍රතිලාභීන් සඳහා රුපියල් ලක්ෂ 38 ක් වටිනා ‘විරුසුමිතුරු’ නිවාස අධාර, වකුගඩු රෝගීන් සඳහා රුපියල් ලක්ෂ 79 ක් වටිනා නිවාස ආධාර, ප්‍රතිලාභීන් සඳහා රුපියල් ලක්ෂ 26 ක් වටිනා ‘සොඳුරුපියස’ නිවාස ණය ප්‍රදානය, පුහුණුලාභීන් 37 දෙනෙකු සඳහා රුපියල් ලක්ෂ 19 විටිනා “ශිල්ප සවිය” ප්‍රතිලාභ ප්‍රදානය සහ දෘෂ්‍යාබාධ සහිත පුද්ගලයින් 141 දෙනෙකුට නොමිලේ ඇස් කණ්නාඩි ප්‍රදානය කිරීමද අමාත්‍යවරයා අතින් මෙහිදී සිදු කෙරුණි.

No comments:

Ad
Powered by Blogger.