"සිරිසේනගේ තනතුරින් මුකුත් කරන්න බෑ" : ශ්‍රීලනිප අපේක්ෂකයෝ දේශපාලනයෙන් ඉවත්වෙති.


ජනාධිපති මෛත්‍රීපාල සිරිසේන මහතා ලබාදුන් ග්‍රාමීය නියෝජිත තනතුරෙන් කිසිවක් කළ නොහැකි නිසා ශ්‍රී ලංකා නිදහස් පක්ෂයේ ක්‍රියාකාරී දේශපාලන කටයුතුවලින් තාවකාලිකව ඉවත්වීමට තීරණය කළ බව එම පක්ෂයේ දෙවිනුවර ආසනයේ පළාත් පාලන අපේක්ෂක අපේක්ෂිකාවෝ අද(30)දික්වැල්ලේ දී පැවසූහ.

දික්වැල්ල රංසි හෝටලයේ පැවැත්වූ ප්‍රවෘත්ති සාකච්ඡාවකදී ඔවුහු ඒ බව පැවසූහ.

ක්‍රියාකාරී දේශපාලන කටයුතුවලින් ඉවත් වුවද ශ්‍රී ලංකා නිදහස් පක්ෂය හැරයාමට මෙතෙක් තීරණය කර නොමැති බවද ඔවුහු අවධාරණය කළහ.
 ඉකුත් පළාත් පාලන මැතිවරණයේ අපේක්ෂකයකු වූ ලාල් ජයදේව මහතා මෙසේ කීය.

“පක්ෂයේ ප්‍රබලයින් පක්ෂය හැර ගිය අවස්ථාවක අපි මේ පක්ෂය රැකගෙන මැතිවරණයට ඉදිරිපත් වුණා. එම අවස්ථාවේදී ජනාධිපතිතුමා අපිව ඔහුගේ ග්‍රාමීය කටයුතු නියෝජිතයා ලෙස පත්වීමක් දී සියලු වැඩකටයුතු අපි හරහා සිදු කරන බව කීවා. නමුත් මේ වන තෙක් ඒ පොරොන්දුව ඉටු වූයේ නැහැ. අපිට අද පාක්ෂිකයාට මුහුණ දෙන්න බැරි තත්වයක් උදා වෙලා.

පසුගියදා දකුණු පළාත් හිටපු අධ්‍යාපන අමාත්‍ය චන්දිමා රාසපුත්‍ර මහතා දහස් ගණනින් රජයේ රැකියා බෙදා දුන්නා. ඔහු අපේ පක්ෂයේ ආසන සංවිධායකවරයකු වුවත් අපිට එක රැකියා අවස්ථාවක් දුන්නේ නෑ. දෙන බවට පොරොන්දු වුණත් අවසානයේ අපි අමතක කළා. ඒත් එක්සත් ජාතික පක්ෂයට විශාල වශයෙන් රැකියා දී තිබෙනවා. අපි මේ ගැටලුව දකුණු පළාත් ආණ්ඩුකාරවරයාටත් ඉදිරිපත් කළා. ඔහුගෙන්වත් අපිට සාධාරණයක් ඉටු වුණේ නැහැ. ඒ වගේම ගමේ සංවර්ධන කටයුතුවලදිවත් අපිට කිසිදු සහනයක් නෑ.

අපිට සිදු වූ අසාධාරණය ගැන ජනාධිපතිවරයාට පක්ෂ මහ ලේකම්වරයාට ලිඛිතව පැමිණිලි කළත් මේ වන තෙක් පිළිතුරක් නෑ. ඒ නිසා අපි තීරණය කළා. ශ්‍රී ලංකා නිදහස් පක්ෂයේ ක්‍රියාකාරී දේශපාලන කටයුතු කරන්න. නමුත් අපි පක්ෂයෙන් ඉවත් වන්නේ නෑ. ඉදිරියෙදිත් මේ තත්වය නම් මීට වඩා දැඩි තීරණයක් ගන්න බලාපොරොත්තු වෙනවා”

ඉකුත් පලාත් පාලන මැතිවරණයේ අපේක්ෂකයින් වු සුමිත් චාමින්ද, සුරේඛා නිල්මිණි හා එම්.එච්.කේ.ලලිතා යන මහත්ම මහත්මීහු ද මෙහිදී අදහස් දැක්වූහ.

No comments:

Ad
Powered by Blogger.